* دخلت الميدان من شارع القصر العيني ،، بعد ما عديت اللجان الشعبية ، ومن عند مجلس الوزراء تقريبا بدأت أشم ريحة الغاز مع إن الضرب كان في شارع محمد محمود .. خريطة توضيحية
* وانا داخلة ، كان كل اللي خارج لابس كمامة شكلها مش جايب نتيجة ، وفي ناس شايلة ناس دايخة وعينيهم حمرا جدا ووشهم ملتهب ، تقريبا كل اللي خارج بيكح .. وطبعا في ناس واقفة تسترزق (اللي بيبيعوا كمامات )
*اول مكان كان شارع محمود ، انا اصلا معرفتش ادخل الشارع من كتر الناس اللي فيه ، حاولت أدخل كذا مره لكن فعلا حسيت ان الرجالة قايمين بالواجب وزيادة .
* الناس اللي بموتوسيكلات عاملة دور رهييييييييييب ، كل حد يدخل يجيب مصاب من قلب الشارع ويوديه المستشفي .. بجد ربنا يباركلهم .
*رحت المستشفي الميداني (قدام المجمع) من قبل ما أعدي السلك اللي حاطينه واحد سألني داخلة ليه ؟ قولتله هساعد .. قالي "اتفضلي" استغربت جدا (في الظروف دي غالبا الواحد بيبقي متوتر مش بتاع اتفضلي وكده بس افتكرت 25 يناير وابتسمت ).. بس ده الميدان يعني بتشوف فيه أجمل حاجة في مصر ).. مبقتش استغرب لما اسمع "بعد إذنك"، "لو سمحتي" وحاجات كتير من النوع ده .
*شفت ناس اعرفها صدفة ، كله بيساعد مفيش وقت للكلام .. أطباء المستشفي الميداني كلهم شباب وفي منهم لسه بيدرسوا ، بس فعلا قايمين بواجب بطولي ، أنا كنت بساعد دكتور في الاسعافات الاولية وانا تعبت وهو متعبش .. بيستقبل بمعدل 3 حالات في الدقيقة .. ومعاه دكاترة تانيين كتير .. من كتر ما خايفين ع الناس بيتسابقوا مين يعالج ده ؟ .. الدكاترة دول مش اللي بيطلعوا في البرامج الطبية ولا اللي بياخدوا كشف 200 جنية من مريض مش لاقي يتعالج .. الدكاترة دول لو لسه معندهمش خبرة فهم عندهم الأهم .. الضمير .
* الدكاترة شغالين بأقل المعدات وأبسط التكاليف ، عاملين خيم للعظام والجراحة والحالات الحرجة بيودوها الاسعاف علي طول ، في جزء كمان للأدوبة والمعدات الطبية .. النظام والتقسيم من أهم الحاجات اللي ممكن تشوفها هناك
*ريحة الغاز كانت بتزيد كل شوية ، مع الوقت بدأت أكح واحس بدوخة بس كنت بتماسك .. دانا كنت بشمها علي بعد أمتار كتير .. لكن المصابين اللي شوفتهم عرفوني اني بت خيخة ، واحد من المصابين كان جاي ايديه محروقة وفاقد الوعي ، واللي شايلينه قالوا انه شاف القنبلة هتقرب من صحابه فشالها بإيده ورماها بعيد .
* كان في مصاب في خيمة الجراحة بيصرخ بألم رهيب ، خلي كل الناس تسكت للحظات ولا كأننا سامعين صوت ضرب نار .. صوت الوجع دايما أقوى ..
* تأثير الغاز في أبشع صوره شوفته في واحد تاني .. راجل طويل وعريض ومرمي ع الارض بيتشنج بوجع يزلزل جبل ، كان بيركل الارض برجله كأن جواه نار ، والدكاترة من حواليه مش عارفين يعملوله حاجة ولا يمسكوه حتي لحد ما الاسعاف جه .. المنظر ده خلاني أكره أي كلب سلطة وخلاني نفسي يدوقوا نفس العذاب .
*بنت جميلة جدا كانت جاية متشالة برضو مغمي عليها ، أول ما فاقت كنت برش علي وشها مية وبديها عصير وبتكلم معاها عشان تفوق .. ابتسمت وضحكت وقالتلي انا كويسة شوفي المصابين الجداد أحسن .. في مدبحة بتحصل جوه
* من المصابين اللي استغربت اوي وانا ببصلهم ، كان شاب طويل ولابس بدلة شيك جدا وشنطة كروس بتاعة لاب بتوب .. لما شوفته افتكرت الناس اللي بتقول اللي في التحرير بلطجية .. للعلم كل اللي في التحرير مناظرهم نضيفة حتي لو شكلهم بسيط .
* من الحاجات الجميلة ان في أطفال من سن 7 سنين ، و6 كمان لحد 18 و19 سنة .. الجيل ده متربي ع الرجولة بجد ، وفي عيال ولاد تيت جايين ياخدوا عصير وأكل من بتاع المعتصمين والمصابين .. الأول اتضايقت منهم .. بعد كده قولت أهو مدخل يمكن منه يحبوا الثورة .
* شفت طفل صغير عنده بتاع 7 سنين .. ماسك سندوتش وقرب مني واداهولي قالي انا مش جعان خدي كلي انتي بتشتغلي .. شاورتله علي خيمة كده قولتله روح وديه هناك :)
* مسمعتش خطاب المشير وانا في الميدان .. صوت الرصاص والصراخ من القنابل كان أقوى بكتير .
* رغم كل الوجع وضرب النار ، أول ما الهتاف يرجع تاني كله بيهتف بصوت واحد "يسقط يسقط حكم العسكر "
* محدش يقول إن الميدان فيه ليبراليين او سلفيين او غيره ، التحرير فيه مصريين ، انا لما دوخت اللي فوقني واحد بدقن "ومقاليش اني متبرجة أو عيب أو حرام أو أي حاجة من العته ده " .. وجابلي ساندوتش وعصير وكان في منتهي الذوق .. قولتله اديهم لحد تاني انا فوقت خلاص .. قالي طيب ياللا كملي شغلك مش عايز اشوفك قاعدة .. !
*التحرير فيه كل حاجة ، لو عايز تبقي دكتور شاطر مش هتلاقي جو أحسن من كده تتمرن فيه ، لو إعلامي ده مكان شغلك .. تغطية الأحداث عن قرب ، لو كيميائي محتاجينك تحلل الغازات السامة دي ، لو رياضي وجسمك قوي تعالي شيل المصابين ، لو عامل ديلفري عندك موتوسيكل أو تعرف تتصرف فيه من حد تعرفه هتبقي أشطر طيار بيوصل المصابين للمستشفي ..لو مدرب تنمية بشرب حفّز الناس انهم ينزلوا ويكملوا ، لو صيدلي محتاجينك ف المستشفي .. لو كاتب مش هتلاقي مكان أحلي من كده في قصص ورويايات تفوق الخيال ، لو مدوّن انزل شوف وارجع انشر الحقيقة علي مدونتك .. أيا كان تخصصك هتلاقيلك حاجة تعملها بيه ، التحرير مش بس ثورة وتصدي للعنف .. التحرير بيعلمنا كتير
* وانا مروّحة ركبت تاكسي كان مشغل اغاني عااااادي جدا ولا كأن في أي حاجة ، الاعلام الفاسد بتاعنا عزل الناس عن المشاركة وفهمهم ان الثورة دي حدث استثنائي في التحرير بس .. لأ الثورة في كل مكان ، وممكن تساعد وانت في بيتك وانت بره مصر . افضحوهم .. اتصلوا بوسائل الاعلام قولوا الحقيقة .. وبمنتهي الذوق والاحترام .. احنا ثورتنا ثورة نضيفة .. بالظبط زي ما السفير ده عمل
http://www.youtube.com/watch?v=VvDFZm5YffU&feature=share
* كنت بتكلم في التليفون وانا في المترو وواحدة ست سمعتني بتكلم عن التحرير بتقولي انتي بقي من اللي بيقبضوا باليورو ؟ قولتلها ياريت .. لو تعرفي حد بيقبّض الناس قوليلي عليه لحسن الثورة اللي فاتت مخدتش ولا أجندات ولا كنتاكي ولا شلن !
* لما تلاقي واحد متصاب في رجله وبيربطها ويقوم يرجع تاني ، وواحد متصاب في عينه وبيتعالج ويرجع تاني .. وواحدة بيتحرش بيها كلاب الداخلية وبترجع تاني .. يبقي ده معناه ايه ؟ الناس دي أكيد مش غاوية بهدلة .... الناس دي عندها مبدأ.. الناس دي بتدافع عني وعنك .. عن كرامتنا .. يبقي يا تحترمهم يا تتنيل تقعد ساكت .
* الناس اللي بتقول اللي في التحرير دول قابضين كام ؟ أحب أقولك إن اللي بيعملوه لا يُقدّر بثمن .
الكلام ده مش للناس اللي بتنزل لأنهم عارفينه وشافوه كتير جدا وبالنسبة لهم عادي وأقل من العادي كمان .. ده مكتوب للناس اللي مبتنزلش .. يمكن يحسوا ان في اللحظة دي في واحد محتاج دمّك .. أو محتاجك تشيله توديه المستشفي .. أو تقف مكانه وتحمي بلدك .. أو تدعيله
من مشاهدات بسمة العوفي ، لمشاهدة الموضوع الأصلي اضغط هنا
ليست هناك تعليقات:
إرسال تعليق